Á vefsíðu Ríkisskattstjóra er hægt að skila inn rafrænu skattframtali. Við rafræn skil á skattframtali er hægt að sjá strax bráðabirgða álagningarseðil og síðar staðfestan álagningarseðil.

Innskráning
• Þegar komið er inná skatturinn.is má finna uppi í hægra horni forsíðunnar hnapp með lástákni.
• Þegar smellt er á hnappinn opnast þjónustuvefir ríkisskattstjóra, þar skal smella á hnappinn „Innskráning á þjónustuvef“.
• Nú birtast þrjár mismunandi leiðir til innskráningar, handhægast er að nota rafræn skilríki eða veflykil.

Innskráning með veflykli
• Hægt er að skrá sig inn með veflykli ríkisskattstjóra.
• Ef áður hefur ekki verið óskað eftir veflykli er smellt á hnappinn „Sækja veflykil“.
• Velja þarf hvert á að senda veflykilinn, á lögheimili eða í heimabanka. Ef veflykill er sendur í heimabanka birtist hann undir rafræn skjöl.
• Þegar veflykill hefur verið sóttur er hægt að skrá sig inn á þjónustuvef Ríkisskattstjóra með því að stimpla inn kennitölu og veflykil.

Innskráning með rafrænum skilríkjum
• Hægt er að skrá sig inn með rafrænum skilríkjum í síma. Stimpla þarf inn farsímanúmer og smella á „Innskrá“.
• Eftir stutta stund opnast staðfestingargluggi í síma. Eftir að hafa yfirfarið að sama öryggisnúmer sé á heimasíðunni og símanum þínum slærð þú inn PIN númerið þitt í símann.

Þitt svæði á þjónustuvef Ríkisskattstjóra
• Þegar innskráningu er lokið opnast þitt svæði á þjónustuvef Ríkisskattstjóra.
• Á forsíðu þíns svæðis er hægt að sjá hvort skattframtali hafi verið skilað, hægra megin við þau skilaboð er hægt er að velja um að, ,,senda inn leiðréttingu”, ,,sækja afrit” og ,,opna álagningarseðil”.
• Á forsíðu kemur einnig fram ef borist hafa ný skilaboð.
• Á forsíðu birtist tilkynning þegar búið er að opna fyrir skil á skattframtali.

Rafræn skil á skattframtali
• Þegar opnað hefur verið fyrir skil á skattframtali er hægt að skila með rafrænum hætti á þjónustuvef.
• Til að opna rafrænt skattframtal þarf að stimpla inn og staðfesta ýmsar upplýsingar og smella á hnappinn ,,opna framtal“ neðst í hægra horni.
• Eftir að búið er að fara yfir skattframtalið og fylla inn þær upplýsingar sem vantar er smellt á ,,skila framtali“.
• Nú ætti að birtast staðfesting á móttöku rafræns skattframtals.